Është formuar ekipi Rajonal i Avokuesve Publik

Faza e dytë e procesit KOMRA, Institucionalizimi i Iniciativës KOMRA (kalimi i Iniciativës nga niveli civil në politik) ka filluar me formimin e Ekipit Rajonal të Avokuesve Publik (ERAP) në Tetor të vitit 2011. Anëtarët e ekipit, në ftesë të Fondit për të Drejtën Humanitare, kanë propozuar organizata partnere të cilat në mënyrë aktive kanë marrë pjesë në procesin konsultativ për tre vjet e gjysmë mbi mandatin e KOMRA-së. Qëllimi parësor i ERAP është avokimi politik për formimin e KOMRA-së.

ERAP përbëhet nga: Zdravko Grebo, profesor në Fakultetin Juridik në Sarajevë, Dino Mustafiq, regjisor teatral, dhe gazetarja Gjenana Karup-Drushko (B dhe H), Zharko Puhovski, profesor në Fakultetin Filozofik në Zagreb (Kroaci), gazetari Adriatik Kelmendi (Kosovë), gazetari Dragoljub Vukoviq (Mali i Zi), gazetari Dinko Gruhonjiq dhe aktivistja për të drejtat e njeriut, Natasha Kandiq (Serbi), dhe Prof.dr. Zhidas Daskalovski (Maqedoni).

Biljana Vankovska, profesoreshë në fakultetin Filozofik në Shkup (Maqedoni) ka dhënë dorëheqje nga anëtarësia në ERAP në Nëntor të vitit 2013 pasi që ka konsideruar se nuk ka arritur sukses adekuat në avokimin publik në Maqedoni. Gazetari Igor Mekina (Slloveni) ka ndërprerë aktivitetet në ERAP dhe Iniciativën KOMRA në Janar të vitit 2014.